Rakel prófar fiðlu

Helgi og Rakel fóru á opið hús hjá Kulturhuset í Lundi. Þar var verið að leyfa krökkum að prófa ýmis hljóðfæri og Rakel vildi endilega prófa fiðlu. Arnar Ingi missti af þessu öllu saman þar sem hann liggur heima með flensu.

Píanó

Arnar Ingi í fyrsta píanótímanum. Hann hefur svo mikinn áhuga á píanói að við gáfum honum hljómborð í jólagjöf og svo var að hann byrja í píanókennslu og fannst svakalega gaman.

Rakel kom með í píanókennsluna hjá Arnari Inga og klappaði kisu á meðan.

Grasekkja

Helgi stakk af til Stokkhólms í gær til að vinna og verður alla vikuna.

Krakkarnir fóru á sundnámskeið í gær og gekk ágætlega. Reyndar eru sundlaugarnar hérna alveg ískaldar og ég vorkenni krökkunum að fara ofan í. Arnar Ingi á líka mjög erfitt með það og fyrsti sundtíminn var algjör martröð. Hann bara stóð alveg stjarfur og vildi ekkert gera, vældi og vildi bara fara uppúr. Hann tók ekki þátt í neinu. Tíminn í gær gekk mun betur og hann var hetja og reyndi að synda en var svolítið lengi að byrja á því.

Og smá fréttir...ég og Rakel ætlum að koma til Íslands í skólafríi krakkana í febrúar. Við verðum 14-22.febrúar. Það verður vonandi ekki ófært, man að í fyrra á sama tíma var mamma að berjast við að komast aftur til Íslands en það var ekki hægt að fljúga vegna storms á Íslandi. Ég sé nú alveg fyrir mér hvernig þeir feðgar verða í fríinu. Hangandi saman í tölvuleikjum langt fram eftir og gleyma að borða og sofa svo lengi á morgnanna. Þeir verða eins og tveir unglingar! Ekki nema ég verði eins og eggjaklukka og hringi á þriggja tíma fresti og minni þá á að borða og svo hringi ég og segi að nú eigi þeir að fara að sofa!! Nei, ég ætla sko bara að njóta þess að vera á Íslandi með Rakel.

Ég fór í saumaklúbb á föstudagskvöldið og við vorum einnig að kveðja eina í saumaklúbbnum sem var að flytja til Ísland á laugardaginn. Við vorum alveg óvanalega lengi miðað við okkur þreyttu húsmæður í saumaklúbbnum og ég kom ekki heim fyrr en rúmlega hálf þrjú.

Svo fórum við Helgi í matarklúbb til Möggu og Björns Inga á laugardagskvöldið. Og auðvitað gat hún Emelie barnapían okkar passað! Hún klikkar ekki. Við fengum andarpaté í forrétt, svo var fondue með nautalund og tilheyrandi í aðalrétt og tiramisu í eftirrétt. Þetta var alveg frábært kvöld og við skemmtum okkur öll alveg stórvel. Við erum átta í matarklúbbnum, góður og skemmtilegur hópur. Svo kemur að okkur Helga næst að vera með matarklúbb....hmmmm, hvað á þá að bjóða uppá? En það er hausverkur seinni tíma.

Allt komið í gang

Jæja, þá er öll rútína að komast í gang. Skólinn kominn á rétt ról og skautar, karate, sund og skátar að byrja.
Ég er að fara í saumaklúbb á föstudagskvöldið og svo er matarboð hjá matarklúbbnum á laugardagskvöldið. Við erum reyndar ekki búin að heyra frá barnapíunni með kvöldið en þetta hlýtur að reddast, við vælum þá bara í eitthvað af íslendingunum hérna og sjáum hvort við getum komið krökkunum á þau.
Örbylgjuofninn okkar bilaði milli jóla og nýárs og er kominn í viðgerð. Það sló öllu út og við þurftum að skipta um öryggi. Mig hefur held ég aldrei langað eins mikið í örbylgjupopp og núna þegar ofninn er bilaður. Og mér finnst ég ekki nota örbylgjuofninn mjög mikið en það kemur nú annað í ljós þegar maður hefur hann ekki...alltaf þarf maður að hita eitthvað eða bræða. Og í staðinn þarf lengri tíma og meira uppvask til að fá sömu niðurstöðu. En fljótlega fáum við ofninn og þá ætla ég að poppa!!
Veit ekki hvað ég verð dugleg að blogga núna, veit svo sem ekki hvort að einhver annar en mamma er að lesa og ég tala nú við hana í síma nokkrum sinnum í viku. Alla vega ef það eru fleiri sem lesa þá eru þeir ekki duglegir að kommenta! Sé til hvað ég geri, kannski held ég áfram en blogga sjaldnar. Over and out!

Bráðum rútína aftur.

Ég bíð spennt eftir að rútínan byrji aftur á þessu heimili. Krakkarnir byrja í skólanum á fimmtudaginn 8.janúar.

Ég stefni á það að halda áfram í ræktinni og byrja vonandi á því á fimmtudag, alla vega föstudag. Ástandið á mér er nú ekki gott þessa dagana. Er búin að liggja í sukki og sælgæti í heilan mánuð eða meira. Og ég er búin að vera ótrúlega viljug að baka og búa til eitthvað gotterí. Fengum fullt af íslensku nammi og ég er búin að borða 80% af því. Það er sem betur fer búið núna. Ég ætla hvern einasta dag að byrja að trappa mig niður í áti en einhvern veginn fer allt í sama horfið.....narta allan daginn í sætindi...arrgg!
En vonandi kems þetta í rétt horf þegar rútínan byrjar.

GLEÐILEGT ÁR KÆRU VINIR OG ÆTTINGJAR!