Bólusetning og fertugsafmæli.

Krakkarnir fóru í bólusetningu númer 2 við svínaflensunni í gær í skólanum. Arnar Ingi er búinn að vera kvefaður og sprautan fór ekkert sérstaklega vel í hann. Hann fékk smá hita eftir fyrri sprautuna. Hann kom fyrr heim úr skólanum í gær, fékk sér smá að borða og fór svo að sofa. Hann svaf í tæpa fjóra klukkutíma, vaknaði 18:30. Samt var hann sofnaður aftur um kl.22:30. Hann er heima í dag.
Rakel kvartaði yfir höfuðverk þegar hún vaknaði og oft hlusta ég ekki á hana því að hún nennir ekki að koma sér í skólann og þá segi ég að hún geti bara komið heim ef hún verður áfram slöpp í skólanum. Það gerist nánast aldrei. En núna ákvað ég að leyfa henni að vera heima vegna sprautunnar, maður veit aldrei. En hún er búin að vera eldhress í dag, fer sko í skólann á morgun.

Við fórum í matarklúbb til Möggu og Björns Inga síðastliðið laugardagskvöld. Hittum allan hópinn og fengum frábæran mat eins og Birni Inga einum er lagið og skemmtilegur félagsskapur. Ekki skemmdi fyrir að íslendingar unni dani í handbolta :-)

Nú styttist í það að Helgi verði fertugur, já eftir 10 daga, 5.febrúar. Við fáum matarklúbbinn í mat á laugardeginum 6.febrúar. Minni og Agnes ætla að koma í hádegismat þann 5.febrúar því þau eru upptekin á laugardeginum. Erum ekki alveg ákveðin hvað við gerum svo um kvöldið 5.febrúar.
Við komum svo til Íslands um miðjan febrúar og þá verður haldið uppá afmælið hans Helga. Fyrst verður það matarboð fyrir fjölskyldur okkar á föstudagskvöldi 19.febrúar og svo á að halda stórveislu með mat á laugardeginum 20.febrúar fyrir góða vini og maka þeirra, kannski rúmlega 20 manns.
Þannig að Helgi fær þrefalda fertugsafmælisveislu! Og það skemmtilega er að áður fyrr sagðist hann ekkert vilja gera á fertugsafmælinu!

Eldhúsið okkar á Íslandi.

Eldhúsið okkar í húsinu á Íslandi er nánast tilbúið. Það eru bara smáatriði eftir eins og að fá háf yfir eldavélina, flísaleggja vegginn hjá vaskinum og inni í vinnuskápnum. Einnig vantar ramma utan um nokkrar innstungur. Og svo þegar við flytjum þá setjum við annan ísskáp og frysti sem passa betur inn í eldhúsið í staðinn fyrir þessa gömlu. Einnig þurfum við að finna út úr því hvað við setjum á stóra auða vegginn, málverk eða jafnvel stóra ljósmynd á striga eða eitthvað sem kemur vel út.



Horft inn í eldhúsið frá ganginum.

Á endanum hægra megin er hægt að ganga inn í stofuna.

Nýi bakaraofninn sem er stór, 90cm breiður. Við erum einnig með gamla ofninn á veggeiningunni.

Horft frá glugganum inn að ganginum. Heildarlengdin á eyjunni er ca. 325cm.

Vinnuskápurinn lokaður.

Vinnuskápurinn alveg opinn.

Alveg opinn.

Hliðin á vinnuskápnum lokuð.

Langt síðan.

Það er nú langt síðan ég hef bloggað.
Við fórum til Íslands 28.desember og komum aftur heim til Lundar 8.janúar. Ég get nú alveg sagt það að ég kom alveg dauðuppgefin heim. Það var svo mikið að gera við að hitta vini og vandamenn í endalausum matarboðum. En það er ekki hægt að segja annað en það hafi verið gaman...hefði bara mátt vera smá frí inn á milli.
Það var alveg æðislegt að vera í "nýja" húsinu sínu og nýja stóra eldhúsinu. Alveg ótrúleg breyting og góð tilfinning í húsinu núna. Set inn myndir við tækifæri.

Krakkarnir byrjuðu í skólanum á mánudaginn 11.janúar. Rútínan er að skella á og í næstu viku byrjar sundið hjá þeim, skátar og píanó hjá Arnari Inga. Helgi er farinn til Swindon og svo er það Noregur hjá honum í næstu viku og Swindon þar á eftir...ég er sem sagt orðin grasekkja aftur.

Ég fór til bæklunarlæknis vegna hjánna á mér á mánudaginn. Ég er með eitthvað auka bein eða brjósk vöxt í hægra hné og svo er ég með eitthvað annað að vinstra hné, eitthvað sem gæti horfið allt í einu eða er komið til að vera. Það er hægt að fara í aðgerð vegna hægra hnésins en það er ekki öruggt að ég verði betri og aðgerð er alltaf áhætta. Á meðan hnéið læsist ekki þá þarf ég bara að hafa það svona. Og í sambandi við vinstra hnéið þá er ég í sjúkraþjálfun og ég þarf bara að læra að lifa með hné vandamál og vera í sjúkraþjálfun og passa mig vel, gera það sem ég veit að virkar. Fúlt, en svona er lífið!

Mr. BIM

Fórum í heimsókn til Möggu og Björns Inga. Þarna eru Helgi og Björn Ingi að skoða símana sína og ræða tæknimál!