GLEÐILEGA HÁTÍÐ KÆRU ÆTTINGJAR OG VINIR.

Snjór í Lundi.

Bökunarkartafla.

Keypti nokkrar bökunarkartöflur út í búð og sá svo hvernig ein þeirra leit út þegar ég kom heim!

Jólin nálgast.

Þá styttist heldur betur í jólin. Helgi er komin heim frá Englandi og komin í jólafrí, hann fer ekki að vinna fyrr en 11.janúar aftur. Krakkarnir líka komnir í jólafrí og ég......veit ekki, alltaf sama vinnan hjá mér, þvo, þrífa, kaupa í matinn, elda o.s.frv....

Það bara snjóar og snjóar hérna í Lundi og það er alveg frábært. Þetta er þriðji veturinn okkar hérna og við höfum ekki séð svona mikinn snjó hérna. Erum með útiborð í garðinum og það er ca. 40cm snjór ofan á borðinu. Krakkarnir eru bara úti að leika sér í snjónum og að renna sér á snjóþotum.

Við vorum í mat hjá Möggu og Birni Inga í kvöld og það var gaman að hitta þau, góður matur. Rakel var svo þreytt eftir að hafa verið með vinkonu sína í næturgistingu og þær vöknuðu kl.6 í morgun og svo er hún búin að vera úti í allan dag að hún sofnaði í sófanum hjá Möggu og Birni Inga og svaf þar meirihluta kvöldsins. Svo geispaði hún alla leiðina heim og sofnaði nánast strax aftur.

Við erum ekki alveg búin að ákveða hvað við ætlum að hafa í matinn á aðfangadagskvöld en erum með þá hugmynd að hafa hreindýrakjöt eða eitthvað álíka. Svo á ég íslenskan lambahrygg sem við ætlum að hafa líka um jólahátíðina.
Annan í jólum ætlar svo matarklúbburinn að hittast ásamt börnum heima hjá Siggu og Sigga í kaffiboð. Við fjölskyldan komum svo til Íslands 28.desember.

Krakkarnir með súkkulaði

Andreas Stuhlmüller sem er að vinna með mér lét mig hafa svissnesk súkkulaðihreindýr til að gefa krökkunum. Hér eru þau áður en þau voru étin á hryllilegan hátt.  Hreindýrin þ.e.a.s.

Horft inn í eldhúsið þann 28.nóvember þegar ég kom til Íslands.

Eldhúsið

Horft inn eftir stofunni 28.nóvember.

Granítið að koma á eldhúsið 30.nóvember.

Baðherbergið þegar ég kom til Íslands.

Horft inn í bílskúrinn.

Þvottahúsið leit svona út 28.nóvember.

Svefnherbergisgangurinn 28.nóvember.

Aðeins komin mynd á stofuna þann 6.desember.

Þvottahúsið tilbúið og í fullri notkun, 6.des.

Handlaugin og skápurinn sem við komum með frá Svíþjóð.

Eldhúsið ekki alveg tilbúið en verður það fyrir jólin.

Komin tími til.....

....að skrifa smá á bloggið.
Mamma og pabbi voru hérna hjá mér í nóvember og það var æðislegt að hafa þau. Við fórum svo saman til Íslands og ég var þar í 10 daga en Helgi var heima með börnin. Það gekk alveg ágætlega en auðvitað með smá hnökrum ;-) Hann var nú frekar glaður að fá mig heim og sagði ég hlakka til að fá mat að borða! Og svo beið auðvitað fullt af þvotti að þvo en ég held nú samt að aumingja Arnar Ingi hafi nú bara verið í sömu fötunum allan tímann með ég var á Íslandi, skipti bara um sokka og nærbuxur....litli kallinn minn, ef honum er ekki sagt til þá bara er hann!

Þegar ég kom til Íslands og í Lálandið þá var þar allt á fullu við að laga og breyta í húsinu. Ég hélt nú að það myndi nú aldrei takast en með vinnu frá morgni til kvölds og með mömmu og pabba sem þræla tókst okkur að breyta Lálandinu í smá heimili. Það er reyndar ekki alveg búið eldhúsið hjá okkur, eftir að setja framan á allar skúffur og alla skápa en það verður vonandi gert eftir helgina og þá er allt að verða klárt. Við fjölskyldan komum svo öll til Íslands 28.desember og verðum til 8.janúar. Mér hefði aldrei tekist þetta án mömmu og pabba og svo kom Sigrún Karls einn daginn og vann eins og þræll. Það munar ótrúlega um hverja manneskju sem hjálpar til.
Ég get nú alveg sagt að mér fannst þetta nú ekkert sérstaklega skemmtileg Íslandsferð en ég vissi það nú svo sem. Bara þrif og að rífast aðeins við iðnaðarmenn. Hitti ekki marga vini mína en ég á það bara til góða þegar við komum um áramótin.
Ég ætlaði að kaupa eitthvað af íslenskum mat til að fara með til Lundar en það var hrúgað á mig svo mörgum jólagjöfum til barnanna að ég tók eiginlega ekkert með mér, þurfti meiri að segja að skilja eftir 2 jólagjafir og leðurstígvélin mín. Þó svo að pakkarnir séu kannski ekki þungir þá taka þeir svo mikið pláss og ég var nú ekki með einhverja risatösku. En það eru alla vega komnir pakkar til krakkana hingað. Ég verð bara að kaupa mat næst þegar við komum.

Því miður er jólaskapið ekki alveg komið í mig, ég sem hef alltaf verið svo mikið fyrir jólin og er alltaf tilbúin með allar skreytingar og jólaljósin 1.desember. Núna er ég bara ekki að nenna þessu og er svona að rembast við að skreyta eitthvað og gera aðeins jólalegt. Ég nenni nú samt ekki að skreyta svona mikið eins og ég hef gert áður. Svo þarf bara að fara að setja sig í gírinn og búa til jólaísinn, hann er nú alveg ómissandi um jólin.

Við fórum á Luciuhátíð í skólanum hjá Arnari Inga á miðvikudagskvöldið og þau voru alveg yndisleg þessir krakkar. Svo verður Lúsíuhátíðin hjá Rakel á mánudagskvöldið.

Við erum að fara í matarboð í kvöld til Ragnheiðar og Rafns og þau eru búin að bjóða alveg hrúgu af íslendingum, alltaf svo mikill kraftur í þeim, þau eru með 3 börn og það fjórða á leiðinni.

Helgi er að fara til Englands á mánudaginn en kemur sem betur fer heim á fimmtudagskvöldið...þá verður engin Englandsferð fyrr en um miðjan janúar.

Andreas og Helgi

Ég fór með góðum vinum hérna í Swindon verkefninu út að borða á krána "Calleys Arms". Það var auðvelt fyrir þjónustustúlkuna að taka við pöntunum því að það voru allir með "Fillet steak, medium rare".

Á myndinni er ég að drekka "6X" sem er local Ale. Drykkurinn bragðast svipað og bragðsterkur bjór sem látinn er standa þangað til hann er orðinn volgur og goslaus.

Rúna og Ralf

Nánast búið

Það má segja að tímabil mitt sem grasekkja sé nánast búið eða alla vega að vera ein með börnin. Helgi kemur í kvöld og svo fer hann ekki aftur fyrr en á þriðjudaginn. Og þá koma mamma og pabbi í heimsókn. Þau stoppa til 28.nóvember og ég flýg með þeim heim til Íslands. Helgi verður líklega heima allan desember fyrir utan kannski 3-4 daga í Stokkhólmi þegar jólahlaðborðið í vinnunni verður hjá honum.

Ég er að baka köku sem eftirrétt fyrir matarboðið sem við höldum á morgun. Hlakka til að hitta hópinn.

Allt kom vel út hjá tannsa, þarf bara aðeins að hreinsa tannstein. Ég fer svo í röntgen á hné á þriðjudaginn næsta og svo er bólusetning gegn svínaflensunni á fimmtudaginn. Vikunni þar á eftir fer ég með Rakel til bæklunarlæknis til að skoða á henni fæturna því hún þarf að fá stærra innlegg í skóna sína. Nóg að gera í læknastússi en allir samt nokkuð heilbrigðir.

Fljótlega.

Það styttist í það að mamma og pabbi koma í heimsókn. Bara vika þangað til, þau koma 17.nóvember....gaman, gaman.

Rakel fór í skátaferð á sunnudaginn og skemmti sér vel. Arnar Ingi fór og tók sundmerki. Það er tekið próf í sundskólanum (ef börnin vilja) og séð hvað þau kunna mikið. Svo er sagt hvaða sundmerki gildir fyrir hverja æfingu/getu. Arnar Ingi tók 5 sundmerki og er rosalega stoltur, þetta eru svona nælur og þar sést í hvaða flokki þau eru í.

Krakkarnir fóru í bólusetninguna fyrir svínaflensunni í skólanum síðasta fimmtudag. Það var mjög þægilegt, bara komið í skólann og börnin bólusett, ekkert að panta tíma og fara á heilsugæsluna. Þau voru rosalega dugleg og þetta tók fljótt af. Þau voru bæði mjög aum í handleggnum í tvo daga og Arnar Ingi var slappur á föstudeginum og fór ekki í skólann. Hann fékk illt í magann og smá hita og svo illt í handleggnum. En þau eru eldhress núna.

Ég fer til tannsa á morgun í árlega skoðun og svo er bara að vona það besta, að ekkert sé skemmt.

Við erum með matarboð á laugardaginn fyrir matarklúbbinn okkar, það verður gaman að hitta allan hópinn.

Bara þrjár vikur eftir að þessu grasekkjustandi mínu. Eftir það á Helgi nú að vera í fríi frá Swindon, getur líklega unnið heiman frá okkur í desember og svo verður líklega þannig að hann fer aðra hverja viku til Swindon og vinnur aðra hverja viku heiman frá. Það verður strax mikill munur. Og þetta byrjar þá í janúar.

Vetrarfrí

Núna er vetrarfríinu að ljúka. Við erum búin að vera í fríi í heila viku þ.e ég og krakkarnir, Helgi auðvitað að vinna í Englandi eins og venjulega. Við erum búin að hafa það frekar rólegt, vinir í heimsókn og krakkarnir í heimsókn hjá vinum. Fórum einu sinni í sund og svo er búið að vera Halloween hérna. Við höfum verið síðustu tvö vetrarfrí á Íslandi þannig að þetta er í fyrsta skiptið sem við erum hérna á Halloween. Við vorum nú ekki viss um hvað það væri mikið haldið uppá það hérna í Svíþjóð en það virðist vera eitthvað aðeins. Krakkarnir fóru um með grímur og bönkuðu hjá fólki og sögðu "Bus eller godis" sem er auðvitað "Trick or treat". Þau komu svo með fulla fötu af nammi heim. Og svo voru þó nokkuð að krökkum sem komu til okkar og ég var tilbúin með nammi handa þeim. Helgi skar út grasker í fyrsta skiptið og það heppnaðist bara vel. Við höfðum það svo fyrir utan og kveiktum á kerti inni í því....bara nokkuð flott!

Við fjölskyldan fórum svo í bíó í dag og sáum myndina UPP....frekar skemmtileg mynd, ágætis húmor.

Núna eru feðgarnir að horfa á síðustu myndina af Lord of the rings. Búnir að horfa á alla seríuna í nokkrum hollum á líklega einum mánuði. Ég hélt að þetta væri nú kannski of ógeðslegar myndir fyrir Arnar Inga en nei, hann var rosalega spenntur yfir myndunum.

Svo á morgun er skóli hjá okkur og sundnámskeið og öll rútínan, Helgi að fara til Englands og núna er bara fjórar vikur eftir.

Mánuður eftir

Jæja, nú er rúmlega mánuður eftir af vinnutörninni hans Helga í þetta sinn alla vega. Hann er eftir að vinna í Englandi í 5 vikur og það er nú svolítið síðan ég byrjaði að telja niður. Það er frekar einmanalegt að vera í útlöndum án fjölskyldu og vina og eiginmaðurinn að vinna í "öðru útlandi". Auðvitað er maður ekki vinalaus hérna en það er öðruvísi þegar maður er með nýjum vinum, ekki æskufélögum og bestu vinum sínum. Og auðvitað fjölskyldan, foreldrar og systkini.
Ég er nú samt búin að vera svo heppin að bæði hefur Katrín kíkt í heimsókn í viku og einnig Anna María í viku. Og auðvitað mamma og pabbi í rúmlega tvær vikur og svo koma þau aftur í heimsókn til okkar eftir þrjár vikur.....þann 17.nóvember...jíbbííí!!

Ég var að fá tíma í röntgen myndatökuna vegna hnjána á mér, ég fer 17.nóvember og get þá strax farið að nota mömmu og pabba í það að passa því ég á ekki tíma fyrr en klukkan hálf fjögur og þá eru krakkarnir komnir heim úr skólanum. Ég er ennþá á bólgueyðandi og verkjastillandi lyfjunum og mér líður mun betur. Ég geri nú heldur ekkert sem reynir á hnéin og finn það ef ég þarf að ganga í nokkrar mínútur þá reynir á helv.... hnéin. En vonandi er þetta bara allt að lagast og svo kemur kannski eitthvað í ljós í röntgen myndatökunni.

Rakel fer svo til bæklunarlæknis vegna fótanna á sér þann 24.nóvember. Það er komin tími á ný innlegg í skóna hjá henni og þá þarf hún að hitta bæklunarlækni. Við fengum síðast innlegg á Íslandi og þau eru orðin of lítil núna.

Og fyrst ég er nú að tala um lækna þá á ég tíma hjá tannlækni 10.nóvember í árlega skoðun og Helgi fer í desember til tannlæknis í sína árlegu skoðun.

Ég átti fína afmælishelgi núna. Átti afmæli í gær (25.október) og Helgi eldaði frábært nautafille á laugardagskvöldið og svo vorum við með smá kaffi og kökur í gær og buðum Möggu og Birni Inga. Afgangurinn af matarklúbbnum (Addi, Helga, Sigga og Siggi) eru á Íslandi því að það er vetrarfrí alla þessa viku í skólunum.
En takk þið sem senduð mér afmæliskveðjur!

Hné

Jæja, þá er ég búin að fara til læknis út af hnénu á mér eftir mánuð af verkjum. Er komin á verkjastillandi og bólgueyðandi töflur og svo á ég að fara í röntgen fljótlega. Hér í Svíþjóð virkar það þannig að læknirinn sendir beiðni og svo fæ ég tíma í röntgen í pósti. Þannig að ég veit ekki alveg hvenær ég fer í röntgen. Læknirinn vill líka að ég byrji í sjúkraþjálfun en ég ætla nú að bíða með að rjúka í sjúkraþjálfun þangað til það er komin niðurstaða úr röntgenmyndatökunni. Veit nú ekki af hverju þetta byrjaði en ég get nú hvorki hjólað né farið í göngutúra. Geri bara það sem nauðsyn krefur og þá er mér bara minna illt. Ætla nú samt að fara að byrja aftur í ræktinni en þá verð ég bara að sleppa upphitun á brettinu og gera bara æfingar fyrir efri hluta líkamans. Sjáum hvernig það gengur.
Helgi á leiðinni heim í kvöld...hlakka til að hitta hann. Skautar hjá Arnari Inga á morgun, dans hjá Rakel á sunnudaginn og svo fer Rakel líka í afmæli til Önnu vinkonu sinnar.

Góða helgi!

Og svona var veðrið í Lundi meðan það snjóaði á Íslandi.

Börnin í vettvangsferð með Helga.

Rakel 7 ára, voðalega fullorðinsleg!

Snjórinn í byrjun október á Íslandi.

Nýir álgluggar í húsið. Borðstofan.

Bílskúrsgluggarnir.

Og svo stækkun á eldhúsinu áður en gluggarnir og rennihurðin komu í. Svefnherbergis svalahurð við hliðina á.

Og volla....gluggarnir og rennihurðin (í miðjunni) komin í.

Íslandsferðin búin

Þá er ég komin aftur heim í Lund. Ótrúlegt hvað tíminn leið hratt á Íslandi enda alveg feikinóg að gera.
Náði samt að hitta nokkrar vinkonur. Hitti Helgu Ævars, og svo fórum við Guðrún á Ruby Tuesday að borða og það er bara orðin fastur liður hjá okkur að hittast þar þegar ég kem til Íslands. Fór að heimsækja Önnu Maríu, Katrínu og hitti svo saumaklúbbinn hjá Sigrúnu Davíðs. Síðan var auðvitað matarveisla hjá mömmu og pabba og fjölskylduhittingur. Ég heimsótti afa gamla og einnig tengdapabba. Og svo við tölum nú ekki um alla iðnaðarmennina sem hitti vegna endurbótanna á Lálandinu.
Ég reddaði ýmsu í sambandi við endurbæturnar og nú er bara allt að gerast og vonandi að koma einhver mynd á þetta fljótlega.

Og auðvitað þegar maður er á Íslandi fær maður allar tegundir af veðri. Lenti í snjókomu og kulda og svo kom brjálaður stormur!

Flugið frá Íslandi gekk eins og í sögu og það var þessi fíni meðvindur og ég komst á leiðarenda á góðum tíma.

Helgi er farin aftur til Swindon að vinna og ég sé hann á föstudagskvöldið. Hann er nú ekki til í það að vera heimavinnandi húsfaðir!

Tíminn líður hratt....

....þegar það er gaman!
Anna María var að fara í dag aftur til Íslands. Við erum búnar að vera saman í viku og hafa það rosalega fínt og tala mikið! Við erum búnar að vera á heilmiklu búðarrölti og Anna María búin að kaupa heilmikið af nýtilegum hlutum.
Við fórum saman í ræktina, fórum í göngutúra og höfðum það svakalega gott. Anna María kenndi krökkunum að prjóna því að ekki hef ég þann hæfileika að kunna það. Þau voru rosalega ánægð og eru nú með orm sem var prjónaður.

Helgi kemur líka frá Englandi í kvöld og við höfum þá morgundaginn til að hittast og tala saman áður en ég kem svo til Íslands á laugardaginn. Ég sé að ég hef alveg nóg að gera í sambandi við húsamálin okkar en vonandi verður líka góður tími í að gera eitthvað skemmtilegt.

Sjáumst!

Það styttist.....

.... í að Anna María komi í heimsókn, bara 2 dagar! Og Helgi kemur líka heim sama kvöld....það verður partý!!

Það er búið að vera fjör hérna í dag. Vinur hans Arnars Inga kom með okkur heim úr skólanum og svo var hamast og leikið, hann borðaði með okkur og svo fóru þau öll á skátafund núna.

Á mánudaginn var Iceland Express með tilboð. Ég keypti ferð til Íslands 28.nóv. til 7. des. Lálandið á að vera tilbúið 1.desember og þá ætla ég að vera á fullu að þrífa og ganga frá og koma húsgögnunum inn í húsið og gera allt tilbúið svo við fjölskyldan getum komið í heimsókn milli jóla og nýárs þ.e koma til Íslands þá og fara aftur til Sverige eftir áramótin. Og það skemmtilega við að þetta tilboð kom er að mamma og pabbi ætla að koma aftur í heimsókn í nóvember. Þau koma 17.nóvember og svo förum við saman til Íslands þann 28.nóv.

Svo er ég að koma til Íslands eftir 10 daga, kem laugardaginn 3.okt til 10.okt. En það verður heilmikið sem ég þarf að gera og redda í sambandi við húsið. Verð líklega í erindum mest allan tímann, en til þess er þessi ferð nú farin.

Kornmylla.

Kíktum inn í mylluna þar sem verið var að mala korn og selja.

Mölle.

Arnar.

Veitingastaður við vitann.

Viti í Mölle.