Yoga

Prófaði yoga í fyrsta skiptið í gærkvöldi....hef farið í Pilates á þessum tíma en kennarinn var veikur þannig að það var yoga í staðinn. Veit ekki hvað ég á að segja....annað hvort fannst mér þetta bara svona leiðinlegt og hægfara eða að kennarinn var ekki nógu góður! Finn alla vega enga þörf fyrir að fara aftur.

Rakel fór til tannlæknis í morgun og er með byrjun á smá skemmd sem á að laga. Hún er samt mjög dugleg að bursta tennurnar, burstar sjálf á morgnanna og svo burstum við tennurnar hennar á kvöldin.

Hún þarf einnig að fara til augnlæknis því að í skoðun hjá skólahjúkkunni kom í ljós að hún sér ekki nógu vel, ekki skrítið svo sem með báða foreldrana hálf sjónlausa áður en við fórum í laseraðgerðina fyrir 8 árum! Við erum bara að bíða eftir að fá tíma hjá augnlækni, fengum bréf að hún yrði kölluð til augnlæknis innan þriggja mánaða.

Klukkan

Þá er tíminn að fara að breytast hjá okkur í nótt. Klukkan færist fram um eina klukkustund þannig að það verður 2ja tíma mismunur á Íslandi og Svíþjóð.
Því miður er verið að stela frá okkur einum tíma í nótt og Arnar Ingi er að fara í dagsferð með skátunum á morgun og á að mæta kl.10:00. En þá er klukkan bara 9:00 miðað við tímann í dag. Úpppsss, þá þarf að vekja litla dýrið á sunnudagsmorguninn. Man að í fyrra var einmitt bekkjarafmæli hjá Arnari Inga á þessum degi og það byrjaði einnig kl.10:00. Það var svolítið skrýtið að fara með barnið í afmælisveislu eins og klukkan væri bara 9:00 á sunnudagsmorgni!

Rakel er ennþá með hálsbólgu og það er aðeins farið að renna úr nefinu á henni. Það aftrar henni samt ekki að í dag er nammidagur og það er þegar búið að senda mig út í búð að kaupa nammi! og hún er byrjuð að háma í sig.

Skautanámskeiðið hjá henni kláraðist síðasta laugardag og í dag er sýning en hún missir því miður af henni.

Það var að koma dagskrá með sumarsundnámskeiðum í sundskólanum sem þau eru í og ég er búin að panta fyrir krakkana. Það er ótrúleg ásókn í þessi námskeið því að það er svo lítil sundkennsla í skólunum hérna í Svíþjóð. Þau verða sem sagt á námskeið frá 6.júlí - 24.júlí fimm daga vikunnar.

Svo komum við til Íslands í sumar og vonandi kem ég þeim að á sundnámskeiði á Íslandi meðan við erum þar. Ég og Rakel komum 9.júní og strákarnir koma svo 14.júní. Við förum svo öll saman 2.júlí til Lundar. Við ætlum að stússast í húsamálum í sambandi við Lálandið. Hitta smiði og sjá hvaða framkvæmdir við förum í núna.

Góða helgi öll sömul!

Matarklúbburinn

Björn Ingi, Helga og Helgi.

Addi, Magga og Sigga.

Siggi, Elsa og Addi.

Hvar er vorið??

Það er ótrúlegt hvað vorið er lengi á leiðinni hingað í Lund þetta árið. Búið að vera ískalt síðustu daga og alveg heilmikið næturfrost. Held bara að páskaliljurnar og túlípanarnir fari að drepast ef þetta heldur svona áfram...vonandi eru þeir ekki dauðir. En reyndar er spáð rigningu og hita næstu daga og vonandi kemur ekki páskahret eftir það.

Mamma er farin og það var ótrúlegt hvað þessir 10 dagar sem hún stoppaði voru fljótir að líða. En Villi og fjölskylda koma til okkar 7.apríl og vera um páskana.

Við mamma lentum nú í smá ævintýri þegar ég var að keyra hana út á Kastrup flugvöll. Við lögðum af stað tímanlega og þegar við vorum að nálgast Eyrarsundsbrúnna þá var skilti þar sem sagði að brúin væri lokuð vegna óhapps! Mamma fékk næstum því hjartaáfall og hélt bara að hún myndi nú missa af vélinni. Jæja, ég keyrði út af hraðbrautinni og við stoppuðum við lestarstöðina í Svågertorp sem er mjög nálægt brúnni. Þar lagði ég bílnum og við fórum með lestinni á Kastrup, það tekur innan við 15 mínútur að fara þaðan á Kastrup. Við sáum síðan bílaröðina út um lestargluggann og mamma var bara fegin að hafa tekið lestina frekar en að hafa beðið eftir að brúin opnaði. Mamma komst í flugið og ég tók lestina til baka til Svågertorp og keyrði svo þaðan heim.

Við fórum í matarklúbb á laugardagskvöldið og það var alveg rosalega gaman eins og venjulega, góður hópur finnst mér. Hún Sigga er algjör snilldarkokkur og maturinn var æðislegur! Og svo var svo gott að vita að mamma var heima að passa.

Rakel litla er heima með hálsbólgu, bara virkilega bólginn háls, vonandi verður ekkert meira úr þessu, ég veit nú alveg hvað er leiðinlegt að fá streptókokkasýkingu. Var alltaf að fá svoleiðis reglulega og svo voru hálskirtlarnir teknir úr mér þegar ég var 25 ára held ég. Slapp svo alveg við streptókokka þangað til í fyrra þegar við fórum til Ameríku... 7,9,13 eins og við segjum stundum.

Búðir, búðir, búðir

Við mamma erum sko búnar að vera á heilmiklum þvælingi í búðir þessa dagana. Búnar að fara í tvær verslunarmiðstöðvar og svo löbbuðum við í bæinn heiman frá mér og röltum svo í búðirnar í bænum. Við erum nú reyndar svona mest að skoða, höfum nú ekki fundið mikið til að kaupa, reynum að vera skynsamar og kaupa ekki allt sem okkur langar í. Svo erum við fullt á kaffihúsum og fáum okkur hádegissnarl og bakkelsi.

Við Helgi fórum í Pilates á mánudaginn og mamma passaði! Helgi var nú ekki alveg að finnast Pilates það rétta fyrir sig.....fannst þetta alveg ótrúlega erfitt, það lítur nú samt ekki út fyrir að vera erfitt en leynir á sér.

Rakel er að fara í náttfatapartý á föstudagskvöldið og svo í afmæli á laugardaginn. Við Helgi förum svo í matarklúbb á laugardagskvöldið og mamma passar! Aldeilis munur að hafa mömmu svona á heimilinu.

Mamma komin

Mamma kom á föstudaginn og var bara komin hingað í hús um hádegi. Uppúr ferðatöskunni birtust fullt af kræsingum. Páskaegg, pítusósa, vogaídýfa, hvítlauksostur, hangikjötsálegg, hamborgarhryggur, tromp, ópal, staur og þristur.....namminammmmm. Einnig leyndust í töskunni nokkur íslensk slúðurblöð, Vikan og Séð og Heyrt.

Við erum svo sem ekki búnar að gera mikið....fara í göngutúra og svo skruppum við á Nova Lund svæðið og kíktum í nokkrar búðir í gær. Það var reyndar skautadagur hjá Rakel í gær og mamma kom með að horfa á dömuna á skautum. Ég bakaði appelsínuköku og við borðuðum með bestu lyst.

Dagurinn að byrja núna og ekkert sérstakt planað í dag, ég ætla að skreppa aðeins í ræktina og svo verður göngutúr og líklega aðeins kíkt í búðir :) Svo kemur bara í ljós hvað við viljum gera.

Lífið er ljúft...

Þá er enn ein helgin að baki og við búin að hafa það mjög gott eins og venjulega.
Fórum í 9 ára afmæli til Óðins á laugardaginn og það var svo gaman að við fórum ekki fyrr en kl. 21:30 um kvöldið.....langsetnir gestir! Og það var svo gott að fá Vogaídýfu, það eru ekki til svona góðar ídýfur hérna í Sverige.

Sunnudagurinn var svo mest leti, fór reyndar í ræktina og svo fórum við aðeins í búðir og fundum strigaskó á Arnar Inga. Hann átti bara ein kuldastígvél sem eru að verða svo slitin að ég bíð eftir að þau rifni í sundur.

Það er svo lokaður skólinn hjá krökkunum í dag og á morgun, reyndar opið frístundaheimilið á morgun en við ætlum að leyfa þeim að vera í fríi, stefnum á það að fara í Skattkammarön sem er risastórt leiksvæði fyrir krakka. Þau fara svo á sundnámskeið í dag. Ég ætla að skreppa í Pilates í kvöld, það er í boði einu sinni í viku í Nautilus stöðinni þar sem ég æfi. Eins og áður þá er ég svakalega dugleg að æfa en það er eins og ég sé úr blýi, allt spik situr pikkfast á mér! Óþolandi!

Og svo er von á mömmu í heimsókn á föstudaginn 13.mars og hún ætlar að stoppa hjá okkur til 23.mars....gaman, gaman....við getum farið á smá búðarráp og kíkt á hvað er að gerast í vortískunni. Reyndar hef ég mest gaman að því að kíkja í svona búsáhalda og skrautvörubúðir....þá þarf maður ekkert að hugsa hvort eitthvað passi á mann eða ekki (oftast ekki!).

Grasekkja

Þá er Helgi að fara til Stokkhólms og verður alla vikuna. Hann fer alltaf mjög reglulega burtu og hefur núna farið eina viku í mánuði undanfarna 5 mánuði. Það er ekki hægt að segja að það sé skemmtilegt að vera hálfgerð "sjómannskona" en nú þegar börnin eru orðin þetta stór þá er ekkert mál að vera svona "einstæður". Það var verra þegar Rakel var 1.árs og Arnar Ingi 3.ára, þá var leiðinlegt að vera einn heima. En mér er sko engin vorkunn, ég á góðan mann og yndisleg börn og við höfum það svo gott hérna í Lundi!

Svo styttist í páskana og þá koma Villi, Hulda og börnin í heimsókn til okkar. Þau verða nú samt burðardýr fyrir okkur því við heimtum að fá íslensk páskaegg, hlakka svo til að fá gesti og páskaegg!

Mars!

Það er alveg ótrúlegt að það sé strax kominn mars. Ég er mjög ánægð með það, þá styttist í sumarið. Það er nú búið að vera smá vor í lofti hérna hjá okkur í Lundi, fallegt veður, smá sól á lofti en reyndar pínu kalt. Fuglarnir voru syngjandi á fullu og þá kemur svona vorfílingur í mann.

Allt komið í sinn vanagang eftir Íslandsferðina, sundnámskeið, karate, skautar, skátar og píanókennsla.

Fengum Möggu, Björn Inga og Ragnar Helga í pizzupartý í gærkvöldi og það var mjög gaman. Arnar Ingi og Ragnar Helgi voru í tölvunni allt kvöldið, Rakel fann einhvern mörgæsaleik í tölvunni og eyddi bara nokkuð löngum tíma í tölvu miðað við hana en við fullorðna fólkið spjölluðum og borðuðum óhollustu!