Áramót

Þá er enn einu árinu að ljúka, alveg ótrúlegt hvað tíminn líður hratt. Nú erum við búin að búa í Svíþjóð eitt og hálft ár.
Árið 2008 er bara búið að vera mjög gott og við ánægð með það. Þá er bara að halda áfram að hafa það gott og líða vel árið 2009. Það er alla vega áramótaheitið, hafa það gott og líða vel!

Jólin eru búin að vera alveg yndisleg hjá okkur. Krakkarnir bara búin að vera nokkuð þæg en þau eru líka búin að ráða sér svolítið sjálf, fá að vera í tölvu og horfa á sjónvarp svona nokkurn veginn eftir þeirra höfði. Það eru auðvitað svo margir vinir þeirra sem eru ekki heima þannig að við leyfum þeim að hafa ofan af fyrir sér eins og þau vilja. En það styttist svo sem í rútínuna og reglurnar aftur.
Á sunnudaginn buðum við Adda, Helgu og börnum í kaffi og það var svaka gaman að hitta þau.
Í gær komu svo Magga, Björn Ingi og Ragnar Helgi í kaffi og það var líka svaka gaman að hitta þau. Við ætlum svo að kíkja til þeirra í kvöld eftir matinn og skjóta upp flugeldum saman.

Skólinn hjá krökkunum byrjar svo ekki fyrr en 8.janúar og ég held að þau verði nú bæði sátt og ósatt við að byrja, gaman að hitta vinina en ekki gaman að þurfa að fara að læra, alla vega Arnar Ingi þolir ekki að læra.

En við fjölskyldan óskum ykkur öllum gleðilegs nýs árs og hafið það sem allra best!

Opna pakka.

Kveðja frá Lundi.

Arnar að horfa á sjónvarpið og gæða sér á smákökum.

Aðfangadagur

Rakel með piparköku sem hún bakaði í skólanum.


Glöð og spennt.

Feðgar að borða jólamatinn.

Jólakveðjur

Sendum okkar bestu óskir um gleðileg jól og ánægju um hátíðarnar.

Búin að vera þessi venjulegi jólaundirbúningur á þessu heimili. Klára að versla í matinn og fengum íslenskan Ali hamborgarhrygg í Kaupmannahöfn. En mikið var hann dýr þar. það var meiri að segja íslenski verðmiðinn á honum og verðið þar var 3.700 íslenskar krónur. Við borguðum síðan 285 danskar krónur sem gera þetta að ca. 6.600 íslenskum krónum. Við erum að tala um 1,5 kg. En við vonum að hann verði besti hamborgarhryggur sem við höfum smakkað!

Ég er búin að búa til jólaísinn og við erum meiri að segja búin að þjófstarta og smakka hann. Algjört æði!!!

Allir jólapakkar komnir undir jólatréið og mikil eftirvænting í að opna þá. Og mikið er ég fegin því að síðasti jólasveininn er að koma til byggða í nótt! Þá verður ekki meira um að kíkja í skóinn sinn.

Takk fyrir öll jólakortin sem þið hafið sent okkur hingað í Lund.

Hafið það sem allra best yfir jólin,
GLEÐILEG JÓL!

Skólastjórinn

Hann er alveg frábær skólastjórinn í skólanum hjá krökkunum. Í gær kom ég að sækja þau og þá var verið að syngja sænskar jólavísur og dansa í kringum jólatréið. Og í miðjunni var skólastjórinn með gítar og söng hástöfum.
Hann tekur yfirleitt þátt í söngstundum á föstudögum með skólanum og spilar þá á gítar og syngur.
Í sumar þegar það var sumarhátíð og krakkarnir voru að syngja fyrir foreldrana þá sat skólastjórinn með kúluhatt og þverslaufu og spilaði undir.
Hann tekur mikinn þátt í skólastarfinu og fer að vinna í eldhúsinu ef svo stendur á. Skólinn er lítill og mjög heimilislegur. Hann er með börn frá 1 árs til 12 ára.
En því miður á að breyta þessu og börnin verða eingöngu til 10 ára aldurs þarna. Það er mjög mikil ásókn í þennan skóla en svo er annar stærri skóli í hverfinu sem er ekkert sérstaklega vinsæll. Þannig að nú á að breyta og hámarksaldur í skóla krakkana verður 9 ára. Það lítur því miður út fyrir að Arnar Ingi þurfi að breyta um skóla þegar hann fer í 10 ára bekk en það góða við það er svo sem að allur bekkurinn fer með honum í sama skóla. Ekki nema að við verðum komin með heimþrá þá fara börnin bara í Fossvogskóla haustið 2010. En það er alla vega engin heimþrá hjá okkur núna....kemur bara allt í ljós!

Jarðskjálfti

Já, ég vaknaði kl.6:20 í morgun við drunur og að rúmið mitt hristist og skalf. Mjög óþægileg tilfinning eins og svo margir íslendingar vita. Arnar Ingi vaknaði líka og spurði af hverju allt hristist. Rakel svaf eins og steinn og varð ekki vör við neitt.
Helgi er í Stokkhólmi þessa vikuna og slapp við allt saman. Við Arnar Ingi kúrðum svo bara saman og spjölluðum þangað til við fórum á fætur rúmlega 7.

Annars er allt gott að frétta héðan. Jólakortin fóru í póst í gær. Reyndar gerðum við nokkrar tilraunir að taka myndir af krökkunum en það náðust ekki góðar myndir. Sendum bara skástu myndina.
Bakaði smákökutegund um helgina og gerði konfekt. Ætla svo að búa til ís næstu helgi.

Við fórum í matarboð til Sigga og Siggu á laugardaginn og það var alveg stórskemmtilegt, góður matur og gaman.

Fórum svo á skautasýningu hjá Rakel á sunnudaginn, hún skautaði sem lítil lúsía, algjört krútt.

Svo er ég með saumaklúbb í kvöld og ætla að gera eitthvað góðgæti fyrir hópinn.

Ystad

Rölt um bæinn í Ystad.

Skruppum til Ystad, gamall og vel varðveittur bær.

Helgi náði að kaupa sér skó í Ystad. Hann kaupir skó á 3-4 ára fresti.

Keyptum handgert konfekt í þessari fínu súkkulaðiverslun.

Karate beltapróf.

Tristan og Arnar Ingi að bíða eftir að taka próf.


Svo var leikið eftir prófið.

Tekið við prófskírteininu.

Lúsíuhátíð í skólanum.

Sungið á lúsíuhátíðinni.

Jólaföndur í skólanum.

Í jólaskapi.

Arnar Ingi að baka piparkökur.

Verið að skreyta kerti.

Rakel að baka piparkökur.

Nóg að gera

Það er nóg að gera hjá okkur þessa helgina. Arnar Ingi var að taka beltapróf í karate og er núna kominn með gula beltið.
Núna er hann í afmæli hjá Bernhard besta vini sínum og Laura vinkona Rakelar er í heimsókn hjá henni. Ég er að baka súkkulaðibitakökur og gera rocky road nammibita.
Við erum svo að fara í matarboð til Siggu og Sigga í kvöld.
Á morgun er svo skautasýning og lúsiuhátið hjá skautafélaginu sem Rakel er að æfa.
Helgi fer svo til Stokkhólms á mánudag fram til fimmtudags.
Og svona inn á milli núna þá er ég að reyna að skrifa jólakortin, erum að verða svolítið sein að senda þau héðan frá Svíþjóð en það reddast vonandi.....annars verða þetta bara milli jóla og nýárskort!

Mamma og pabbi fóru til Íslands í gær.
Á fimmtudeginum skruppum við í bíltúr til Ystad. Ef að þið hafið lesið eða séð bíómyndir með Wallander þá er það í þessum bæ sem hann er lögga. Ystad er mjög skemmtilegur bær, gamall og vel varðveittur, fín göngugata og strönd. Það búa um 17.000 manns í Ystad.

Jólatívolí í Kaupmannahöfn

Sest niður til að snæða.

Rölt um tívolí.

Flott ljós.

Nestistími.

"Blómaval" í Vellinge

Arnar og Rakel í jólasveinalandi.

Að klappa litlum asna.

Sumir skemmta sér betur en aðrir.

Pabbi og mamma að kíkja á dýravörur.

Koggmuseet í Malmö

Verið að slá Rakel til riddara.

Verið að slá Arnar til riddara.

Um borð í víkingaskipi.

Rakel í gapastokknum.

Verið að æfa sig með lásaboga.

Matarboð 6.des

Alli, Siggi og Jón

Baldur, Rafn og Helgi

Inga, Villa og Agnes

Silla og Inga

Þau eru ennþá....

.....hjá okkur, mamma og pabbi, gaman!
Við erum búin að þvælast í bæinn og keyra aðeins um.
Fórum í gær í jólatívolí í Köben. Tókum lestina frá Lundi til Köben. Það var reyndar rigning en við vorum undir það búin og dressuðum okkur upp í regnfötum og með regnhlífar.
Rakel og Helgi keyptu band um úlnliðinn til að fara í öll tækin. Rakel er svo mikill tívolí fíkill að það dugar ekkert annað en bandið.
Arnar Ingi er ekkert fyrir tækin, hann er með svo lítið hjarta :)
Ég fór með Arnar Inga og leyfði honum að fara í að skjóta niður bolta, fara lukkuhjól og þess háttar. Hann var mjög ánægður með það og fékk ýmis konar smádrasl og bangsa.

Við Helgi fórum í matarboð á laugardag til Ingu og Baldurs. Allir komu með mat á borðið og úr varð þessi glæsilega veisla í góðum félagsskap. Við vorum 14 manns, ein hjónin duttu út því þau fengu ekki pössun. Á veisluborðinu voru lambalæri, brúnaðar kartöflur, waldorfsalat, gular baunir, rauðkál og góðar sósur. Þetta var alveg frábært. Í eftirrétt var svo piparkökuostakaka, alveg ótrúlega góð.
Vel heppnað kvöld. Svo erum við að fara í annað matarboð á laugardagskvöldið 13.desember en þá verða mamma og pabbi farin og ekki hægt að nota þau í að passa! En við erum með svo góða sænska stelpu sem passar að það er ekkert mál.

Þau eru á leiðinni

Já, mamma og pabbi koma í heimsókn til okkar á morgun.....hlakka til, fæ þá líka lakkrís ;)

Við fórum á íslendingaballið á laugardaginn og það var bara nokkuð gaman. Þetta var pínu þorrablótslegt, sviðasulta og rófustappa í forrétt, hangikjöt og uppstúfur í aðalrétt og svo kökuhlaðborð með t.d kleinum, pönnukökum og smákökum í eftirrétt.
Svo söng kórinn og smá skemmtiatriði og þar voru meðal annars kallar að syngja í lopapeysum og gúmmískóm, svona sveitalegt en gaman.
Magga og Björn Ingi voru með okkur á ballinu og svo settust hjón við hliðina á okkur. Við byrjuðum að spjalla við þau og vorum á spjallinu allan tímann. Þetta eru hin viðkunnalegustu hjón og frúin er heimavinnandi en reyndar nóg að gera því að tvö eldri börnin eru í skóla í Malmö og það þarf að skutla fram og til baka. Svo eru þau með einn 3 ára sem má bara fá 15 klst á leikskóla á viku því að mamman er heimavinnandi þannig að hann er bara í leikskóla þri,mið og fimmtudaga. Hjónin heita Sigga og Siggi.
En alla vega þá kíkti ég í heimsókn til Siggu í gærmorgun og það var mjög gaman. Þau búa í bæ hérna rétt hjá Lundi sem heitir Bjärred.
Svo núna eru þau búin að bjóða okkur í mat laugardaginn 13.desember.
Við erum einnig að fara í matarboð laugardaginn 6.desember þar sem allir leggja á borð með sér og við ætlum að notafæra okkur mömmu og pabba til að passa! Hentugt að hafa þau í heimsókn.
Svo er ferð í tívolíið í Köben föstudaginn 12.desember, sem sagt nóg að gera og bara gaman!

Piparkökubakstur

Hanna og Rakel að baka piparkökur.

Arnar Ingi og Bernhard að baka piparkökur.

Keila

Arnar Ingi fór í keilu um síðustu helgi með karate hópnum.

Snjórinn

Arnar Ingi að renna í brekkunni.

Rakel að draga sleðann upp brekkuna.

Það kom snjór í Lundi og við út á snjóþotur. Snjórinn entist í 4 daga en varð nú ekki mikið meiri en þetta en það var vel hægt að renna á sleða niður brekkuna þó svo að grasið hafi staðið upp úr. krakkarnir skemmtu sér alla vega stórvel.

Helgin....

.....er bókuð!
Eins og venjulega eru það karate og skautar hjá krökkunum. Svo er íslendingaballið annað kvöld, spennandi!
Á sunnudaginn er svo verið að kveikja á jólaljósum í miðbænum og hellings skemmtiatriði, jólasveinn og fleira. Það er heilmikið prógramm allan sunnudaginn í bænum þannig að við verðum örugglega stóran hluta úr deginum þar.
Svo á auðvitað að kveikja á fyrsta aðventukertinu. Var að setja kerti í stjaka og svo býst ég við að ég skreyti aðeins, já, hvenær? á sunnudaginn en alla vega á þriðjudaginn, hef tíma þá, mánudagar alltaf frekar þéttir hjá mér.

Og smá fréttir.....mamma og pabbi eru að koma í heimsókn á fimmtudaginn 4.desember.....gaman, gaman, hlakka til að fá þau. Þau stoppa líklega fram á föstudaginn 12.desember, eru ekki búin að kaupa miða til baka, gera það bara með stuttum fyrirvara. Þau ætla að passa fyrir Villa og Huldu þann 13.desember þannig að þau verða komin til Íslands fyrir þann tíma. Og svo erum við að fara í jólatívolíið í Köben þann 12.des.

Góða helgi til ykkar allra!

Blogg leti

Það er einhver blogg leti í mér þessa dagana en vonandi nenni ég að halda áfram að blogga þó svo að það sé bara einu sinni í viku, stefni alla vega á blogg einu sinni í viku.
Það er svo sem ekkert nýtt að gerast, rútínan alveg í fyrirrúmi :)
Vorum með matarboð á laugardaginn og buðum Adda, Helgu og strákunum þeirra. Það var rosa gaman að hitta þau og spjalla.
Bakaði piparkökur með krökkunum á sunnudaginn og þau voru með vini sína í heimsókn og allir svakalega ánægðir, krakkarnir skreyttu svo piparkökurnar og átu fullt og vinirnir tóku síðan með sér piparkökur heim.
Jörðin er ennþá hvít hjá okkur og vægt frost úti. Það er reyndar spáð skýjuðu og hita næstu daga eins langt og spáin nær, það er reyndar týpískur vetur í Lundi, ca 5°c hiti, grátt og skýjað. Þannig var allur fyrravetur, bara skrýtið að það hafi komið snjór og búinn að endast svona lengi.
Helgi farinn til Stokkhólms og kemur aftur á föstudaginn.
Svo er íslendingaballið á laugardaginn með lambalæri, hangikjöti og íslenskri hljómsveit, það verður örugglega stuð að vera á balli með íslendingunum og líklega bara sungin íslensk lög.
Hlakka til!

Snjór!

Það snjóaði hjá okkur í dag! Svaka gaman!
Veðurspáin sagði að það yrði kalt í dag og næstu daga sem spáin nær. En það hefur varla snjóað í Lundi frá því að við fluttum þannig að við vorum mjög ánægð með að fá snjó núna. Hvað hann endist er annað mál, jörðin er hvít en ekkert magn af snjó samt.
Við settum vetrardekkin undir bílinn í gær, alveg á réttum tíma.
Róleg helgi framundan, skautar, karate og laugardagsnammi leiðangur. Keila hjá Arnar Inga með karate hópnum seinnipartinn á morgun. Kannski hægt að fara að renna á snjósleða ef snjóinn heldur.
Ætla að bjóða einhverjum í mat annað kvöld, ekki búin að ákveða hverjum.
Stefnum á það að leyfa krökkunum að baka og skreyta piparkökur á sunnudaginn.
Góða helgi!

Tíminn líður

Já, svakalega líður tíminn hratt, finnst ég nýbúin að blogga en sá svo að það var á föstudaginn.
En fór sem sagt í afmælispartý á laugardagskvöldið hjá Ingu og það var svaka fínt. Indverskur matur og notalegheit. Bara stelpur og kjaftað og tíminn bara flaug.
Í kvöld er svo saumaklúbbur hjá sama genginu og þá fáum við köku og gotterí....hlakka til! Er búin að vera alveg hræðileg í mataræðinu í næstum 2 vikur og sé ekki fram á að hætta því neitt, því miður.
En ég er alla vega byrjuð í ræktinni og vona að það hægi á fitusöfnum meðan ég haga mér svona í sætindunum.
Svo er bara að fara að baka fyrir jólin, já ég segi fyrir jólin því ég veit að það verður ekkert til sem ég baka um jólin, allt búið! Ætla að leyfa krökkunum að baka og skreyta piparkökur og svo á ég bara eftir að finna eitthvað annað gott til að baka.
Hlakka til þegar fyrsti í aðventu kemur því þá ætla ég að hengja upp jólaljósin og skreyta smá, ég bíð alltaf spennt og byrja snemma.
En hafið það gott á fróni, við erum búin að kveikja upp í kamínunni og höfum það kósý!

Jæja.....

....Arnar Ingi góður af magapínunni, fór í skólann í dag.
Svo eru auðvitað fastir liðir, karate og skautar á morgun. Ég fer svo í stelpupartý annað kvöld, gaman, gaman.
Svo er þó nokkuð planað næstu helgar.
29.nóvember er svokallað "1.des" ball hjá íslenska kórnum í Lundi og þar verður boðið uppá íslenskt lambalæri og fleira.
6.desember er svo matarhittingur hjá saumaklúbbnum og mökum og allir ætla að leggja með sér til borðs.
12.desember erum við svo að fara til Köben í jólatívolíið og ætlum að gista eina nótt í Köben. Ætlum að vera í tívolíinu á föstudeginum og eyða svo laugardeginum í bæjarrölti.
13.desember er svo jólaglögg og afmæli hjá einum maka í saumaklúbbnum.
Svo inn á milli eru svona krakkaskemmtanir t.d lúsíuhátíð í skólanum, keila með karate, jólaball íslendingafélagsins og söngskemmtun hjá bekknum hans Arnar Inga. Þetta er alla vega það sem við vitum um.
En hafið þið góða helgi!

Magapína

Það var hringt frá skólanum í morgun og sagt að Arnar Ingi væri að kvarta undan magapínu. Hann er sem sagt kominn heim og er að taka því rólega, litla greyið!

Kamínan

Kveiktum upp í kamínunni hjá okkur því það er svo drungalegt úti, rigning en samt 12°c hiti. Það er svo notalegt að hafa heitt og gott inni og ekki skemmir fyrir að horfa á eldinn. Við kveikjum nokkuð oft upp í kamínunni yfir vetrartímann.

Kökustund

Við bökuðum bæði speltbrauð í dag og svo súkkulaðiköku. Krakkarnir voru duglegir að skreyta og notuðu part af laugardagsnamminu sínu í skreytingar.

Gönguferð um nágrennið